نجاحك لك!

أستانس من صماصيم قلبي لما ألقى أسر للحين مربية عيالها على نظام تفوقك لك مب لي.. 

ياخي البزر الحين كل ما كح جابوا له هدية وإلا عطوه مكافأة! وإلا يجي راز وجهه: خذت شهادة تفوق يالله جيبوا لي هدية وسووا لي وحطوا لي!

خير إن شاء الله؟! 

أحب جدا الطريقة الي تربينا عليها في بيتنا.. ندرس ونفرح بتفوقنا ويهنؤنا بالتفوق-بدون مايطيرونا السقف- لا وفوق كذا يقولون يالله وين الحفلة؟😂😂

جميل جدا لما يتربى الطفل ويكبر وهو فاهم إن هذا لمصلحته ولا بأس بشي من المكافأة لكنها فضل وتكرم لا واجب يطنقر حضرته إذا ماجابوها له..

وينرفع ضغطي لقالت لي وحدة أصلا أنا ماأبي أدرس.. أنا أدرس بس عشان أهلي.. 

لو إن لي حكم عليها كان خليتها تتخلل في بيتهم لين تنطق على راسها وإلا تعيش حياتها البيتوتية الي ماتمن فيها على أحد.

ونفس الشي لما يقول أحد الوالدين: ذاكر وتفوق عشان ترفع راسي..

ياعزيزي ماأحد يرفع راسك وإلا ينزله إلا عملك .. وولدك صلاحه وطلاحه على نفسه ولازم يفهم هالشي عشان يفهم إنه هو فقط المسؤول عن مستقبله!